લૉ ગાર્ડન

લૉ ગાર્ડન, અધિકૃત નામ શેઠ મોતીલાલ હીરાલાલ પાર્ક, એ ભારત દેશના, અમદાવાદ શહેરમાં આવેલો એક જાહેર બગીચો છે અને ઘણા સમયથી જાણીતું પર્યટન-સ્થળ છે. આ બગીચાનું ૧૯૯૭માં ફરીથી વિકસિત કરવામાં આવેલો. આ બગીચાની દીવાલોને અડીને હસ્તકલાની વસ્તુઓનું બજાર, ખાણીપીણી બજાર અને અન્ય વસ્તુઓનું શેરીબજાર ભરાય છે. આ શેરીબજારનું ૨૦૨૦માં નવીનીકરણ કરવામાં આવેલું છે.

લૉ ગાર્ડન
શેઠ મોતીલાલ હીરાલાલ પાર્ક
અમદાવાદમાં સ્થાન
પ્રકાર	શહેરી બગીચો
સ્થાન	અમદાવાદ, ભારત
અક્ષાંશ-રેખાંશ	23.0264°N 72.5608°E / 23.0264; 72.5608
વિસ્તાર	10.16 acres (41,100 m2)
રચનાકાર	કમલ મંગળદાસ
માલિક	અમદાવાદ મ્યુનિસિપલ કોર્પોરેશન
સંચાલન	આશિમા ગ્રૂપ
Open	સંપૂર્ણ વર્ષ
Water	તળાવ
જાહેર પરિવહન	અમદાવાદ મ્યુનિસિપલ ટ્રાન્સપોર્ટ સર્વિસ જનમાર્ગ રૂટ ૮

સ્થાન

લૉ ગાર્ડન એ એલિસબ્રિજ નગરરચના યોજના ક્રમાંક ૩ના અંતિમ પ્લોટ નંબર ૪૩૦માં આવેલો છે. શહેરના પશ્ચિમ ઝોનના નવરંગપુરા વોર્ડમાં આવેલ ગુજરાત લૉ સોસાયટી (GLS) ની સામે એક વિશાળ ત્રિકોણાકાર ખુલ્લી જગ્યા હતી. બાદમાં તેને સાર્વજનિક ઉદ્યાનમાં વિકસાવવામાં આવી.

બગીચાનું નામ નજીક આવેલ લૉ કોલેજ પરથી પડ્યું છે. તે ત્રણે બાજુથી રસ્તાઓથી ઘેરાયેલું છે. ઉત્તર બાજુએ મ્યુનિસિપલ કમિશનર અને મેયરના બંગલા આવેલા છે જ્યારે પશ્ચિમમાં લો કોલેજ અને સીજી રોડ આવેલા છે. બ્રિટિશ લાઇબ્રેરી, એલિસબ્રિજ જીમખાના, ઇન્સ્ટિટ્યૂટ ઑફ એન્જિનિયર્સ ઑફ ઇન્ડિયા અને રાજ્ય કક્ષાનું રવિશંકર રાવળ કલાભવન દક્ષિણ બાજુએ છે.

ઇતિહાસ

૧૯૯૫માં, અમદાવાદ મ્યુનિસિપલ કોર્પોરેશનના મ્યુનિસિપલ કમિશનરે જાહેર-ખાનગી ભાગીદારી હેઠળ પાર્કના પુનઃવિકાસની દરખાસ્ત કરી હતી. આશિમા ગ્રૂપની બાંધકામ કંપની સૌમ્યા કન્સ્ટ્રક્શન્સ દ્વારા પુનઃવિકાસ માટે ભંડોળ પૂરું પાડવામાં આવ્યું હતું અને કામ પણ હાથ ધરવામાં આવ્યું હતું. આ કરાર ઓક્ટોબર ૧૯૯૫માં થયો હતો. કમલ મંગળદાસ આ કામના સ્થપતિ હતા અને સપ્ટેમ્બર ૧૯૯૫માં બગીચાને ઔપચારિક રીતે આશિમા ગ્રૂપને સોંપવામાં આવ્યો હતો. લગભગ ૮૦ લાખના ખર્ચે આ કામ ૧૯૯૭માં પૂરું થયું હતું. આ કરાર ઓક્ટોબર ૨૦૦૦માં વધુ પાંચ વર્ષ માટે લંબાવવામાં આવ્યો હતો.

વિશેષતા

આ બગીચો 10.16 acres (41,100 m²) વિસ્તારમાં ફેલાયેલો છે. તેમાં ફુલ સુશોભન અને ઘાસનું મેદાન, મોટી સંખ્યામાં બાંકડા, બાળકોના રમવાની જગ્યા, નાનું તળાવ, ફુવારા અને 855 metres (2,805 ft) લાંબો જોગિંગ ટ્રેક છે.

શેરીબજાર

બગીચાની દિવાલની બહાર અને તેને ટેકે આવેલ અનૌપચારિક બજાર સ્થાનિક પ્રવાસીઓનું લોકપ્રિય આકર્ષણ છે. સવારે બગીચામાં ચાલવા અને દોડવા આવનારા લોકો માટે ખાણીપીણી બજાર ભરાય છે. રસ્તાની ફૂટપાથ પર ભરાતું હસ્તકલા બજાર આખો દિવસ કપડાં, ઘરેણાં અને કલાકૃતિઓનું વેચાણ કરે છે. સાંજના સમયે બગીચાની બાજુના રસ્તા પર વિવિધ ખાદ્યપદાર્થો અને અન્ય ચીજવસ્તુઓનું વેચાણ કરતા ફેરિયાઓથી ભરાઈ જાય છે. સ્થાનિક રીતે ખાઉ ગલી તરીકે ઓળખાતા આ ખાણીપીણી બજારને ૨૦૨૦માં હેપ્પી સ્ટ્રીટ તરીકે નવીકરણ કરી જાહેર જનતા માટે ખુલ્લું મુકવામાં આવ્યું હતું.

ફોટા

• 
  પ્રવેશદ્વાર
• 
  બાંકડા
• 
  બાળકોને રમવાની જગ્યા
• 
  તળાવ
• 
  હસ્તકલા બજાર
• 
  ખાણીપીણી બજાર