દીપિકા નારાયણ ભારદ્વાજ

દીપિકા નારાયણ ભારદ્વાજ એક ભારતીય પત્રકાર, દસ્તાવેજી ફિલ્મ નિર્માતા અને પુરુષ-અધિકાર કાર્યકર્તા છે. ભારદ્વાજ એક દસ્તાવેજી ફિલ્મ - માર્ટિયર્સ ઑફ મૅરેજ પ્રસિદ્ધ થયા બાદ પ્રખ્યાત થઈ હતી. ફિલ્મ નવવધૂઓ અને તેમના પરિવારો દ્વારા દહેજ વિરોધી ૪૯૮-એ કલમનાં દુરુપયોગ વિશે હતી. તેણીએ રોહતક વાઈરલ વીડિયો કેસમાં સાક્ષીઓ સાથે ઇન્ટરવ્યૂ કરી કથિત પીડિતોના ષડયંત્રનો પણ પર્દાફાશ કર્યો હતો.

સક્રિયતા

ધારા ૪૯૮-એ નો વિરોધ

ભારદ્વાજના જણાવ્યા મુજબ તે પોતે ૪૯૮-એ ના દુરુપયોગનો ભોગ બનેલી છે. તેણીના કહ્યાં અનુસાર તેણીની નવી પરણેલી ભાભીએ તેના અને તેના પિતરાઈ ભાઈ પર પોલીસ કેસ કર્યો હતો. તેઓ તે કેસમાં ખૂબ જ મોટી રકમ ચૂકવી કોર્ટ-કચેરીના ચક્કરમાંથી છૂટ્યાં હતાં. ત્યારબાદ તેણી સેવ ઈન્ડિયા ફાઉન્ડેશનનાં સંપર્કમાં આવી અને છાશવારે કલમ ૪૯૮-એ ને રદ કરવા અથવા તો પછી કલમને લિંગ તટસ્થ બનાવવા માટેની માંગ કરતી આવી છે.

તેણીની માર્ટિયર્સ ઑફ મેરેજ નામની દસ્તાવેજી ફિલ્મ ૨૦૧૭માં રજૂ થઈ હતી. તે ૪૯૮-એ ના દુરુપયોગનો ભોગ બનેલા પીડિત પુરુષોની વ્યથા જણાવે છે. આ દસ્તાવેજી ફિલ્મ માટે તે વિવિધ ન્યાયાધીશો, સક્રિયતાવાદીઓ અને વકીલોને પણ મળી હતી અને તેમના સાક્ષાત્કારો (ઇન્ટરવ્યૂ) તેમાં દર્શાવ્યાં હતાં.

બળાત્કારના ખોટા કેસ વિશે

ભારદ્વાજ બળાત્કાર અને છેડખાનીના ખોટા કેસોનો વિરોધ કરે છે. તેણી મી ટૂ ચળવળની જેમ જે મેન ટૂ ચળવળને પણ સમર્થન કરે છે અને માને છે કે પુરુષોએ પણ તેમના પર થતાં અત્યાચાર પર મૌન રહેવું જોઈએ નહીં અને બોલવું જોઈએ.

રાષ્ટ્રીય પુરુષ આયોગ

ભારદ્વાજ રાષ્ટ્રીય પુરુષ આયોગની પણ માંગ કરે છે કે જેથી પુરુષને લગતા મુદ્દાઓ જેવા કે ૪૯૮-એ નો દુરુપયોગ, બળાત્કારના ખોટા કેસો વગેરે તે આયોગ સંભાળી શકે.