ઇન્કલાબ ઝિંદાબાદ

ઇન્કલાબ ઝિંદાબાદ (ઉર્દૂ: اِنقلاب زِنده باد; હિંદી: इंक़लाब ज़िन्दाबाद) એક ઉર્દૂ-હિંદી નારો છે, જેનું ભાષાંતર "ક્રાંતિ અમર રહો!" એવું થાય છે.

આ નારો ઉર્દૂ કવિ અને ભારતીય સ્વાતંત્ર્ય સેનાની મૌલાના હસરત મોહાની દ્વારા ૧૯૨૧માં રચવામાં આવ્યો હતો. તે ભગત સિંહ (૧૯૦૭ - ૧૯૩૧) દ્વારા ૧૯૨૦ના દાયકામાં તેમના ભાષણો અને લખાણો દ્વારા લોકપ્રિય બન્યો હતો. તે હિન્દુસ્તાન સોશિયાલિસ્ટ રિપબ્લિકન એસોસિયેશનનો સત્તાવાર નારો હતો. એપ્રિલ ૧૯૨૯માં આ નારો ભગત સિંહ અને તેમના સાથી બી. કે. દત્ત વડે સંસદમાં બોમ્બ ફોડ્યા પછી પોકારવામાં આવ્યો હતો. પછીથી, જૂન ૧૯૨૯માં પ્રથમ વખત દિલ્હી હાઇકોર્ટમાં જાહેરમાં તેમના સંયુક્ત નિવેદનમાં પણ તેનો સમાવેશ થયો હતો. ત્યારથી, આ નારો ભારતીય સ્વતંત્રતા ચળવળના આંદોલનોમાં વારંવાર પોકારવામાં આવતો હતો. સ્વતંત્રતા સંગ્રામ પર આધારિત ભારતીય રાજકીય નવલકથાઓમાં આ નારો ઘણી વખત વિવિધ પાત્રો દ્વારા પોકારાતો જોવા મળે છે.

આ નારો હવે સમાજવાદીઓ અને સામ્યવાદીઓ, ખાસ કરીને CPI (M), CPI અને ડાબેરી રાજકીય પક્ષો દ્વારા વારંવાર વપરાય છે.

બાહ્ય કડીઓ

• ગુજરાતી વિશ્વકોશમાં ઇન્કલાબ ઝિંદાબાદ.