કલિકુંડ તીર્થ, ધોળકા

કલિકુંડ તીર્થ, ધોળકા જૈન ધર્મનું એક મહત્ત્વનું તીર્થ છે, જે અમદાવાદ જિલ્લાના ધોળકા ખાતે આવેલ છે. કલિ પર્વત અને કુંડ સરોવર વચ્ચેની જગ્યામાં આ પરિસર આવેલ હોઈ, આ સ્થાન કલિકુંડ તીર્થ તરીકે ઓળખાય છે. આશરે ૪૦ વીઘા જેટલા વિસ્તારમાં પથરાયેલ આ તીર્થ ખાતે ધર્મશાળાઓ, ઉપાશ્રયો, પાઠશાળા, ભાતાખાતું, ગૌશાળા, પાંજરાપોળ, તેમ જ ૨૪ જિનાલયો આવેલ છે.

સવંત ૨૦૩૫ના વૈશાખ સુદ ૬ના દિવસે પં. રાજેન્દ્રવિજય ગણી તથા મુનિશ્રી રાજશેખર વિ.મ.ની આગેવાનીમાં ભાલાપોળ વિસ્તારના આદિનાથ ભગવાનના જિનાલય ખાતેથી કલિકુંડ પાર્શ્વનાથ ભગવાનની પ્રાચીન મૂર્તિ લાવી અહીં પધરાવવામાં આવેલ છે. આ મુખ્ય મંદિરની પાછળ ૨૦મી ફેબ્રુઆરી, ૧૯૯૬ના દિવસે શત્રુંજય તીર્થની પણ સ્થાપના કરવામાં આવેલ છે, જેથી પાલીતાણા ખાતે ન જઈ શકતા લોકો અહીં દર્શન કરી શકે છે.

ઉત્સવો

• ફાગણ સુદ ૩ - કલિકુંડ સ્થાપના દિન
• મહા સુદ ૧૩ - છ ગાઉ યાત્રા
• વૈશાખ સુદ ૩ - અખાત્રીજનાં પારણાં (વરસી તપ)