ધ કેરલા સ્ટોરી

ધ કેરલા સ્ટોરી ઇ.સ. ૨૦૨૩નું ભારતીય ચલચિત્ર છે જેના દિગ્દર્શક સુદિપ્તો સેન અને નિર્માતા વિપુલ અમૃતલાલ શાહ છે. ચલચિત્રની વાર્તા કેરળની એવી મહિલાઓની વાત કરે છે જેમણે ઇસ્લામમાં ધર્મપરિવર્તન કર્યું હતું અને 'ઇસ્લામિક સ્ટેટ ઓફ ઇરાક અને સીરિયા' (ISIS)માં જોડાઇ હતી.

ધ કેરલા સ્ટોરી
દિગ્દર્શક	સુદિપ્તો સેન
નિર્માતા	વિપુલ અમ્રુતલાલ શાહ
કલાકારો	અદા શર્મા, યોગિતા બિહાની, સોનિયા બાલાની અને સિદ્ધિ ઈદના

આ ચલચિત્રમાં અદા શર્મા, યોગિતા બિહાની, સોનિયા બાલાની અને સિદ્ધિ ઈદનાનીએ અભિનય કર્યો છે. તે ૫ મે ૨૦૨૩ના રોજ પ્રદર્શિત થઈ હતી. ચિત્રપટે પહેલાના ચાર દિવસમાં વિશ્વભરમાં ૪૫ કરોડ રૂપિયાનો વકરો કર્યો અને ૨૦૨૩ની પાંચમી સૌથી વધુ કમાણી વાળું હિન્દી ચલચિત્ર બન્યું હતું.

અભિનય

• શાલિની ઉન્નીકૃષ્ણન / ફાતિમા બા તરીકે અદા શર્મા
• નિમહ તરીકે યોગિતા બિહાની
• આસિફા તરીકે સોનિયા બાલાની
• ગીતાંજલિ તરીકે સિદ્ધિ ઇદનાની
• શાલિનીની માતા તરીકે દેવદર્શિની
• વિજય કૃષ્ણ
• પ્રણય પચૌરી
• પ્રણવ મિશ્રા

સંગીત

ક્રમ	શીર્ષક	ગીત	ગાયક/ગાયિકા	અવધિ
1.	"પાગલ પરિન્દે"	ઓઝિલ દલાલ	સુનિધિ ચૌહાણ, બૈશાખ જ્યોતિ	૨:૦૪
2.	"આંબો અંબમ્બો"	વિરેશ શ્રીવાલસા	અતુલ નારુકારા	૧:૫૨
3.	"અથિરા રવિલ"	વિરેશ શ્રીવાલસા	કે.એસ. ચિત્રા	૨:૦૭
4.	"તુ મિલા"	ઓઝિલ દલાલ	કે.એસ. ચિત્રા	૨:૦૭

પ્રતિસાદ

તેના પ્રથમ દિવસે, ચલચિત્રે ભારતમાં ₹8.03 કરોડનો વકરો કર્યો હતો, જેથી તે ૨૦૨૩માં ભારતમાં પાંચમા સૌથી મોટી આવક ધરાવતું ચલચિત્ર બન્યું હતું. ધ કેરલા સ્ટોરીને IMDBમાં ૮ કરતાં વધુ રેટિંગ મળેલ છે.

કેરળના બે મુખ્ય રાજકીય પક્ષો - ભારતીય રાષ્ટ્રીય કોંગ્રેસ અને કોમ્યુનિસ્ટ પાર્ટી ઓફ ઇન્ડિયા (માર્કસિસ્ટ) દ્વારા આ ચલચિત્રનો વિરોધ કરવામાં આવ્યો હતો અને તેમણે આ ચલચિત્ર રાષ્ટ્રીય સ્વયંસેવક સંઘ પરિવારનું સમર્થન કરે છે એવો આરોપ લગાવ્યો હતો. તેના જવાબમાં નિર્માતા વિપુલ શાહે કહ્યું હતું કે આ ચલચિત્ર પુરાવાઓ પર આધારિત છે અને તેમણે તેના માટે ૪ વર્ષોનું સંશોધન કર્યું છે.

કેરળ હાઇકોર્ટે ચલચિત્ર પર પ્રતિબંધ મૂકવાની ના પાડી હતી અને જણાવ્યું હતું કે ચલચિત્ર ISIS વિશે છે, નહી કે ચોક્કસ ધર્મ વિશે. આવી જ અરજી અગાઉ સુપ્રિમ કોર્ટ અને મદ્રાસ હાઇકોર્ટ દ્વારા નકારવામાં આવી હતી. નિર્માતાઓએ ૩૨,૦૦૦ મહિલાઓ ISISમાં જોડાઇ એવું દર્શાવતું ટ્રેલર પાછું ખેંચ્યું હતું.

તમિલનાડુમાં ચલચિત્રનો વિરોધ થયો હતો અને સંખ્યાબંધ થિએટરના માલિકોએ ચલચિત્ર પાછું ઠેલ્યું હતું.

૯ મે ૨૦૨૩ના રોજ પશ્ચિમ બંગાળના મુખ્યમંત્રી મમતા બેનર્જીએ રાજ્યમાં ચલચિત્ર પર પ્રતિબંધ મૂક્યો હતો. જેના પ્રતિસાદમાં નિર્માતાઓએ કાયદાકીય પગલા લેશે તેમ જણાવ્યું હતું.

બીજી બાજુ ઉત્તર પ્રદેશ અને મધ્ય પ્રદેશ રાજ્યોએ ચલચિત્રને કરમુક્ત જાહેર કર્યું હતું.